تابعونا أيضاً Facebook Instagram

١٠ أنواع الأمهات اللي ممكن تقابليهم في تمارين الأولاد

Image: 
Body: 

 

بما اني بقضي وقت كتير أوي في النادي عشان التمارين . لقيت اني عندي فرصة اني ادرس انواع الامهات المختلفة اللي بشوفهم في النادي. و رغم اختلاف الالعاب و اختلاف النوادي بس لقيت ان تقريبا دول انواع الأمهات اللي ممكن الواحد يشوفهم.

١- الأم اللي علطول بتدور علي اولادها و مبتبقاش عارفه هما خلصوا تمريين ولا لأ .الأم ديه دايما تلاقيها جت وصلت اولادها التماريين وبعدها مشييت يأما عشان تمشي في التراك أو راحت الچيم أو معرض النادي و عمتآ مبتبقاش مهتمة انها تعمل صداقات مع بقية الأمهات . وتلاقيها جت بعد التمريين مايخلص عشان تجيب ولادها اللي غالبا بيبقوا خلصوا التمريين و طلعوا بره الملعب و بيقعدوا كل مره يدوروا علي بعض .
الأم ديه بتبقي رايقه أوي و مكبره دماغها علي الأخر و تلاقي باقي الأمهات بيحسدوها علي الروقان ده بس مش عارفيين يعملوا زيها .

٢- الأم اللي علطول بتكلم مع الكابتن وماشيه وراه يابتوصيه علي ولادها يا بتسأل علي مستواهم. الأم ديه دايما تلاقيها جوه الملعب ياقبل التماريين يا بعد التمريين يا ساعات كتير أوي في وسط التمريين. بتبقي مهتمة اوي انها تسأل الكابتن علي كل صغيرة و كبيرة في التمرين . و غالبا بتفضل واقفه ترغي مع الكابتن في نفس الكلام كل مرة و بتبقي فاكرة ان الكابتن ده احتكار لولادها بس و ان مفيش غيرهم في التمرين . و غالبا بتلاقي الكباتن بعد فترة بيستخبوا منها و بيحاولوا يقصروا معاها في الكلام بس علي مين 

٣- الأم اللي علطول في وسط التمرين عماله تشجع اولادها و تزعقلهم انهم يتمرنوا كويس ولا كأنهم بيلعوا في الاولمبياد . و طبعا دي أكتر أم موتره ممكن تقعدي جمبها في التماريين لأن ممكن تكون بتكلم معاكي وفجأه تلاقيها قامت وعماله تزعق لولادها . الأم ديه غالبا بتبقي أم رياضية او كانت بتلعب نفس اللعبة اللي ولادها بيلعبوها عشان كده الرياضه بالنسبة ليها حاجة مهمة جدا و بتبقي مركزة اوي في وسط التمرين و عماله تدي لولادها تعليمات و غالبا بتلاقي الكابتن مخنوق منها لانها ممكن بسهولة اوي تعدل علي كلامه أو تقاطعه و هو بيكلم ولادها

٤- الام اللي علطول معترضة علي نظام النادي و الكباتن و مستوي التدريبات و الملاعب و الادارة. و غالبا الأم ديه هتلاقيها أول واحدة تعمل ثورة و خناقة لو النادي عمل أي تعديل صغير في أي حاجة و تلاقيها عماله تحرض بقية الأمهات انهم يروحوا يشتكوا معاها و لو محدش رضي هي بيبقي عندها استعداد انها تروح لوحدها . ورغم ان الأم ديه ممكن تبان عصبيه بس هي بتبقي في الأصل بتحب ولادها أوي وبتبقي عايزه كل حاجه صح و مبتقبلش بأي غلطات

٥- الأم اللي فاهمة و عارفه كل حاجة : الأم ديه غالبا بيبقي ليها ولاد كبار و بتبقي عارفه كل العاملين في النادي من اول مشرفيين غرف تبديل الملابس للجهاز الفني للعبة . و بحكم انها عندها ولاد كتير فتلاقيها تقريبا عايشه في النادي وعشان كده عندها كل الأخبار و المعلومات عن كل الأنشطة و الرحلات و البطولات .و الأم ديه بتعتبر دايما الأم الروحية لأي جروب والناس كلها بتحترمها عشان كده لما بيحصل خلاف بين اتنين امهات تانيين تلاقيها هي بتقوم بدور المصلحة الأجتماعيه و تصالحهم علي بعض

٦- الأم الأجتماعيه : اللي مصاحبة كل الأمهات و كل الأمهات و الأولاد بيحبوها . و تلاقيها مشتركة يجي في ميت واتس اب جروب و كل الناس عندها علي الفيس بووك. و دايما تلاقيها عماله تتنقل بين الترابيزات لحد مالتماريين تخلص و طول الوقت عماله تقترح في خروجات و أنشطه مختلفه الاولاد ممكن يعملوها مع بعض

٧- الأم اللي علطول متأخرة أو ناسيه مواعيد التماريين : ودي غالبآ بتبقي الأم العاملة . تلاقيها يا عيني علي طول بتجري و متأخرة علي معاد التماريين و غالبا رغم انها بتبقي شايلة ميت حاجة الا انها تلاقيها ناسية برده حاجات التمرين . ويعيني ممكن وهي قعده مستنية التمرين يخلص تاخدلها كده تعسيله في السريع عشان تحاول تشحن طاقتها شوية

٨- الأم الديچيتال : و دي بتبقي غالبا طول وقت التمريين يا بتكلم في التليفون ، يامعاها التابلت بتاعها و عماله تلعب عليه أو بتتفرج علي ڤيديو ، يا حطه الأيبود في ودناها و عماله تسمع أغاني . أو بمعني أخر تلاقيها منفصلة تماما عن المكان و الزمان و معاها حاجة بتسليها طول ماهي قعدة.

٩- الأم الصيفية : و هي الأم اللي بس بتخلي ولادها يلعبوا رياضة في الصيف بس ووقت الشتا و المدارس تلاقيها مركزة اوي في المذاكرة و بطلت تماريين . و غالبا الأم ديه كانت شاطرة في المدرسة فالمذاكرة بالنسبة لها ليها أهمية قصوي و الرياضه مابيقاش ليها دور مهم أثناء الدراسة .

١٠- الأم اللي في حالها: اللي لا عايزه تعرف حد ولا عايزه حد يعرفها . تلاقيها تيجي علي معاد التمرين بالضبط و تفضل قاعدة لوحدها علي ترابيزه بعيد عن بقية الأمهات و بعد التمرين تاخد ولادها وتمشي علطول .بس طبعا النوع ده من الامهات مش موجدين كتير عشان احنا كشعب طبعنا عشري نحب نتكلم طول الوقت

 

TagLabel: 

لقرأة مواضيع مشابهة, الرجاء الضغط علي احدي هذه الكلمات

Dislike
0

تعليقات

rqwsamara9
I read this piece of writing completely egarding the difference of latest and preceding technologies, it's remarkable article.







Look at my website - after party cleaning Bradley Stoke
Sun, 04/01/2018 - 19:37