تابعونا أيضاً Facebook Instagram

كابوس المذاكرة

Image: 
Body: 

 

طول عمري كنت بقعد اتريق علي جارتنا اللي في العماره اللي جنبنا وانا باسمعها كل يوم في سيمفونيات الزعيق في وقت الأمتحانات . كل يوم كان بيبقى في وصلة زعيق و تهزيق لأولادها علشان المذاكرة .كانت الست يعيني كل يوم صوتها يتنبح و كنت بحس انها يا حول الله هيجلها يا الضغط يا السكر يأما مرارتها هتتفقع من كم الزعيق اللي كانت بتزعقه.

طبعآ أنا كنت بقعد انتقد فيها و أقول ازاي الست بتزعق لاولادها كده و حرام عليها و انها كده هتكرهم في المذاكرة وأن أكيد أكيد في طريقه أحسن من كدة عشان تخلي ولادها يذاكروا و كنت متعاطفة أوى مع أطفالها لحد ما ابتديت أذاكر أنا لابني.

طبعآ في الأول أنا كنت متبنية فكرة ان ابني لازم يعتمد علي نفسه و يذاكر لوحده زي مانا طول عمري ماكنت بذاكر لنفسي. من غير رغي كتير و دخول في تفاصيل،لقيت ان الفكرة أثبتت فشلها خصوصآ وقت الأمتحانات.

الواحد أصلأ بيبقى راجع من الشغل خلصان و تعبان و روحه أصلآ في مناخيره من ضغط الشغل و زحمة الطريق، يلاقي نفسه انه مضطر يحضر الأكل و يغدي و بسرعة بسرعة عشان نبتدي المذاكرة. فمفيش وقت بقه نجازف بيه و نشوف هيعرف يذاكر لوحده ولا لأ.

المهم الواحد يخلص كل اللي وراه و خلاص بقه نقعد في للliving room و أروق الدنيا و نظبط القعدة عشان نبتدي مذاكرة و يبتدي الحوار كالأتي.

أنا : يلا يا حبيبي عشان نذاكر
ابني: أنا مش عايزه أذاكر
أنا: لأ يا حبيبي لازم نذاكر عشان بكره الامتحان و الساعة ٦ و انت هتنام كمان ساعتين
ابني: طب أنا جعان 
أنا ( و أنا بحاول أمسك أعصابي): جعان إيه و إحنا لِسَّه مخلصين أكل ؟؟!!
ابني: ايوه بس أنا جعت
أنا : مفيش أكل و روح هات الكتاب من الشنطة
ابني: يووووووووه ، حرام كده أذاكر و أنا جعان
أنا : لأ مش حرام. روووووح هاااااات الكتااااااااب
ابني: طيب
يروح يجيب الكتاب و هو عمال يبرطم بكلام أنا بعمل نفسي مش سامعاه عشان اليوم يعدي.
يغييب يغييب يغييب و لِسَّه مجبش الكتاب

أنا: يلااااا، أنت فييييييييين؟؟؟!!
ابني : ok, جاي أهوه
والاقيه جاي بخطوه بطيئة و بيسحف و هو ماشي بطريقه تستفز الواحد . لأن كل حركاته بتتحول للتصوير البطئ أول ماتيجي سيرة المذاكرة .

أنا: يابني مش ده الكتاب، احنا عندنا إمتحان English وانت جايب كتاب الmaths
ابني( ولا كأني بأقول حاجه): ماما، أنا عطشان
أنا : مفيش شرب و روووووح هات كتاب ال English
ابني: يوووووووووه
يروح يجيب الكتاب و هو برده عمال يبرطم و يدبدب في الأرض . ما علينا ، أنا مش هاتعصب . طفل برده و مش هاحاسبة علي كل حركه
المهم، يغييب يغييب يغييب برده و أنا سامعاه أصوات حاجات عماله توقع من الأوضه

أنا : يلا يااااااابني ... سنه بتجيب الكتاب
ابني: ماما أنا مش لاقي الكتاب 
أقوم رايحه علي الأوضه 
أنا : يعني إيه مش لاقي الكتاب ؟ دورت كويس ؟؟
ابني( بمنتهي البرود): آه دورت
المهم ابتدي أدور عليه و طبعا ألاقيه واضح وضوح الشمس في الشنطه
أنا ( وانا ماسكه الكتاب و أنا ببصله شذرآ) : أمال إيه ده ؟؟؟
ابني: أنا دورت في الشنطه و ملقتهوش
أنا كل ده ماسكه أعصابي ، و عماله أقول معلش أمسكي نفسك ، بلاش تتعصبي، عدي من ١ ل ١٠ . خليكي cool ، احنا لِسَّه مابدأناش مذاكرة
أنا : طب معلش ، يلا يا حبيبي عشان نذاكر بقه
ابني: ماما ، أنا جعان و عطشان 
أنا ( الصوت أبتدي يعلي) : أنا قلت مفيش أكل و لا شرب !!! أحنا أصلا ضيعنا أكتر من نص ساعة بندور علي الكتاب و لِسَّه مابدأناش مذاكره !! يلا أفتح الكتاب عشان نبتدي

بعد ٢٠ دقيقة من المذاكرة و هو أصلا مش مركز معايا و بيبص في كل حتة في الأوضه غير الكتاب و باضطر أقول الكلام علي الأقل مرتين عشان يفهم اللي أنا بقوله ...

ابني: أنا عايز أدخل الحمام
أنا : يا سلااااام ، حبك معاك تدخل الحمام دلوقتي
ابني( براءة الأطفال في عينيه) : ايوة أنا مزنوق 
أنا( و أمري لله) : طب يلا روح بسرعة

قلت فرصة ، الواحد يدخل شويه علي الwhat's app جروب بتاع المدرسه يشوف بقية الأمهات عاملين ايه في المذاكرة. لقيت كله برده عمال يشتكي من الولاد و انهم مش عايزين يذاكروا. قلت طب كويس ، يعني ابني طبيعي أهو مش مختلف عن بقية أصحابه . أومال ليه أنا اللي مكبرة الموضوع و متوترة و موتراه معايا. يمكن عشان أنا علي طول حاسة أني مقصرة معاه و دايمآ مذنوقة في الوقت. طب و هو ذنبه إيه أني بشتغل ؟؟

المهم و أنا سرحانه في دايرة الذنب اللامنتهية، اخدت بالي ان الأمهات عاملين يتكلموا عن الMaths و قد آيه هو طويل و صعب. 
غريبة !! هما ليه بيتكلموا عن ال Maths كل ده و بكره أمتحان الEnglish.
معقوله ؟؟؟؟ أكيد لأ؟؟؟؟ و بأيد بتترعش سألت السؤال اللي مكنتش عايزه أعرف إجابته!! "هو بكرة امتحان إيه؟" . و جت الإجابة : "MATHS"
ببص جنبي مالقتش ابني !! هو فين !! كل ده في الحمام !! طبعآ بيتلكع عشان يهرب من المذاكرة

و في ثانية كان مستوي التوتر وصل للذروة و ابتديت أناديه و أزعق و أدور علي الكتاب و أبص علي الساعة و أحسب فضلنا قد ايه علي معاد نومه و أشوف هنذاكر ازاي في الوقت اللي فاضل . 
و مع هدوء أعصاب و لا مبالاة ابني بالوضع الحالي، تحولت لست مجنونة عماله تذعق مع أني عارفه انه مش ذنبه وإني أنا اللي مركزتش و مع إحساسي ان شغلي هو السبب في عدم التركيز ده ، ابتديت أزعق أكتر.و بقيت أنا و جارتنا الشعنونه بنرد علي بعد في الزعيق كأن في مسابقة خفيه مابينا للصوته أعلي.

و فجأة سكتت و استغربت نفسي. أنا ازاي اتحولت لنسخه من جارتنا اللي كنت عماله اتريق عليها.ازاي بقيت شعنونه كده؟؟
و هنا حضرني المثل اللي بيقول :

تعرف فلانه : اه 
شوفتها و هي بتذاكر لعيالها ؟: لأ 
يبقي متعرفهاش

 

TagLabel: 

لقرأة مواضيع مشابهة, الرجاء الضغط علي احدي هذه الكلمات

Dislike
0

تعليقات

kimberlysc
Skype has launched its internet-centered buyer beta on the world, following

starting it generally in the U.S. and U.K.

before this 30 days. Skype for Web also now supports Chromebook and Linux for instant text

messaging interaction (no voice and video however, all those demand a connect-in installation).





The increase from the beta brings assistance for a longer selection of

languages to assist bolster that international

user friendliness



Here is my page: http://www.unitesdk.com/skype-recorder/talkhelper-skype-reviews/
Sun, 06/25/2017 - 07:14