تابعونا أيضاً Facebook Instagram

ازاى أخلى طفلى ياكل كل حاجة؟

Image: 

مقال للمستشارة الأسرية وأخصائية تعديل سلوك الأطفال : بسمة الشيخ

 

كتير من الأمهات بيشتكوا إن أطفالهم مبياكلوش غير المقليات , الوجبات السريعة, الرز, البطاطس المقلية ,المكرونة.... وبيرفضوا ياكلوا الخضار واللحمة والفراخ أو السمك اللى بيبقوا فى البيت. طيب ايه الحل؟

الحقيقة فيه طرق كتير ممكن لو استعننا بيها تخلصنا من المشكلة دى. بدايةً زى ما دائماً بنقول احنا بنحاول نحط نفسنا مكان الطفل ونشوف احنا لو مكانه حنستقبل الموضوع ازاى؟ وكل ما بنعرف شخصية الطفل أكتر وبنكون متواصلين معاه أكتر بنقدر نعرف اهتماماته ونقدر ندخله منين. حقترح عليكم يا أمهات أساليب جديدة حتساعدكم فى طرح الأكل على الأطفال وتخلى استجابتهم أحسن إن شاء الله: 

 

1) اعملى جدول: اكتبى أيام الأسبوع فى جدول وحاولى على الأقل تملى مثلأ 3 ايام بال3 وجبات وال2 سناك بتوعهم.

يعنى حضرى لطفلك ال3 وجبات الرئيسية وال2 سناك فى اليوم: عصير,فاكهة,خضار, حفنة مكسرات, كيك...الخ.  فكرة انك تبقى مالية اليوم وعارفة حتأكلى طفلك ايه حتخليكى تتجنبى إن فجأة تلاقى طفلك جعان جدأ فتضطرى تأكليه أى حاجة بسرعة أو تستجيبى لرغبته انه ياكل أكل غير صحى أو أى أكل انتى مش عاوزة تأكليهوله.يعنى ممكن مثلاً لو انتى مرتبطة مع طفلك بتمرين 3 أو 4 مرات فى الأسبوع بدل ما تبقى مضطرة انك تجيبى حلويات (Candies) أو أى أكل قدامك فى النادى وخلاص ممكن تبقى عاملة حسابك وواخدة معاكى سناكس زى ما قلنا: خيار, جزر,مكسرات....الخ . ممكن تستعيني بالبلانر اللي بتتلزق علي التلاجة من ماما في الشغل , هتساعدك جدا انك تنظمي جدول الأكل و مشترواتك , شوفي فيديو البلانر في اللينك ده : https://www.facebook.com/mamafelshoghl/videos/1097769720352508

 

2) خططى حتطبخى ايه بالذات فى الغداء: لو مرهق بالنسبة لك إنك تفكرى وتحضرى حتطبخى ايه لمدة اسبوع ممكن تبتتدى بانك على الأقل تعرفى حتطبخى ايه اليومين / ثلاثة اللى جايين. الغداء المتكامل مش محتاج يبقى وجبة متكلفة أو معقدة خالص يعنى : عيش حب كامل/رز/مكرونة /خضار مع بروتين ممكن مشروم/فراخ/فول/سمك/جبنة.

 

3) متتحوليش لشيف فى مطعم وجبات سريعة: يعنى متقعديش تعملى أكتر من صنف عشان عارفة ان ده طفلك حيحبه وده طفلك التانى مش حيحبه وده جوزك بيحبه بس ولادك لأ فتلاقى نفسك فى النهاية عاملة عزومة وكذا صنف عشان ترضيهم كلهم وتتعبى انتى فى الأخر . فانتى حاولى تعملى وجبة متكاملة زى ما قلنا و تقدميها بشكل معين , يعنى ممكن تسمى وجبة الغداء دى وجبة الأسرة: Family Meal دى الوجبة اللى كلنا بناكلها زى بعض ونحاول اننا نتجمع ونتشارك فى الغداء ولومعرفناش نعمل كده يبقى على الأقل بنتشارك فى نفس الأكلة اللى بناكلها فى وجبة الغداء. ده حيولد عند أطفالك روح المشاركة والارتباط بأفراد الأسرة ووحدتهم , حتى لو رفضوا فى الأول لما بنشرحلهم المفهوم بتاعنا وبيشوفونا بنطبقه فعلياً ومتمسكين بيه هم كمان بيبتدوا يتجاوبوا لحد ما تبقى دى قاعدة وعادة أسرية.

 

4) امسكى لسانك: أنا عارفة ان دى حاجة صعبة, بس حاولى متعلقيش كتير على طريقة طفلك فى الأكل أو الكمية القليلة اللى بياكلها. حاولى تبقى حيادية و Neutral على قد ما تقدرى. افتكرى: انتى عملتى اللى عليكى بانك قدمت لأطفالك وجبة متوازنة العناصر, أطفالك بقى مسئولين ياكلوها. لو ابتديتى تعلقى بكلام زى:"كل الخضار بتاعك" حيبقى رد فعل الطفل الرفض والمقاومة.

 

5) قدمى الأكل أو العناصر الجديدة ببطء يعنى واحدة واحدة: الأطفال عندهم فوبيا من تجربة الأكل أو العناصر الجديدة بالفطرة, فابتدى دخلى الأكل الجديد واحدة واحدة ومفيش مانع ان لوطفلك متأثر ببطل فى فيلم كرتون أو ممثل أو أى شخصية عامة أو عائلية انك تستخدمى فكرة ان الشخص ده بياكل الأكل الجديد ده عشان تشجعى طفلك على أكله .

 

6) غمسى الأكل: لو أطفالك مبياكلوش الخضار جربى تحطيلهم الخضار (طماطم, خيار,جزر,بروكى,كوسة....) وتحطى جمبه صوص جبنة, حمص, زبادى... الأطفال بيتشجعوا وبيحبوا فكرة التغميس.

 

7) خلي أطفالك يساعدوكى فى تحضير الأكل: لما الأطفال بيشتركوا فى تحضير الوجبات أو اختيار عناصرها بيتشجعوا أكتر على أكلها (يلا ناكل الأكل اللى عملناه,اخترناه...). ممكن تاخدى أطفالك معاكى السوبر ماركت وده يبقى Quality Time ممكن تستغليه فى انكم تتكلموا مع بعض وتقضوا وقت خاص يحكولك فيه عن أى حاجة حابين يتكلموا فيها وتاخدوا رأى بعض فى اللى عاوزين تاكلوه الأسبوع ده فتخلقوا مادة حديث وتعود واشتياق للوقت ده كل اسبوع.ممكن كمان لو أطفالك فوق سن ال10 سنوات تخليهم يساعدوكى فى تقطيع الأكل ولو أصغر من كده ممكن يساعدوكى فى توضيب السفرة أو مزج العناصر لعمل السلطة أو تحضير بيتزا, كيك....الخ

 

8) امنعى الوجبات السريعة: خليكى فاكرة المسئول عن دخول أى أكل البيت هو انتى مش أطفالك , كل ما بتسيطرى انك متدخليش الوجبات السريعة اللى كلها دهون مهدرجة دى كل ما بتخلقى فرصة أكبرلأطفالك انهم ياكلوا أكل صحى : خضار, فاكهة, بروتين, منتجات ألبان..الخ 

 

9) اسمحى بالحلوى ((Treats: متمنعيش ولادك تماماً من الحلوى لأنهم بيبقوا عاوزين ياكلوها بس ممكن تخليهم يختاروا حلوى غير مضرة زى الجرانولا , حبوب الفاكهة المجففة, الكوكيز...الخ وعشان تمنعى الطفل من أكل أو شرب حاجة معينة لازم تفهميه ليه وايه تأثيرها وتحترمى عقليته علشان لو اتوجد فى مكان وكان قدامه الحاجات دى وانتى مش معاه هو اللى ياخد القرار ويرفض تناولها عن اقتناع بكلامك متبقاش دى فرصة تحفزه على عمل الممنوع منه.وتقبلى انه حيبقى فيه استثناءات ولما الاستثناءات دى تحصل فهميها لأطفالك ان ده مش العادى بتاعنا, يعنى مثلاً زيارات الجد والجدة بيحصل فيها استثناءات أكل Candies , شرب بيبسى .... خروجة كل فترة لمطعم من مطاعم الوجبات السريعة ,حاجات زى دى فلازم نفهم ولادنا ان دى استثناءات.

 

10) اتبسطى وقضى وقت ممتع مع أطفالك: كل ما كانت الوجبة اللى بتعمليها فيها عناصر وألوان كتير , كل ما طفلك بيقبل عليها أكتر. زينى الأكل بالعناصر Smiley face بالخضار على التوست, صوص على شكل طفلك بيحبه على البان كيك, استخدمى البروكلى كشجرة أو أكل ديناصور مثلاً....الخ. ممكن كمان تستخدمى القطاعات وتقطعى الكيك, الكوكيز, التوست... على شكل قلب, دائرة...الخ, الحاجات البسيطة دى بتشجع الطفل جداً على الأكل وتجربة العناصر الجديدة وبتزود من طاقته الايجابية وابداعه وتقديره لاهتمامك بيه.

 

11) انتى المثل الأعلى والقدوة: لو انتى مبينة لأطفالك انك دائماً عاملة دايت ومبتكليش كل حاجة أو طول النهار بتكلمى قدامهم على الموضوع ده , أطفالك كمان حيبقوا كده وحيرفضوا يعملوا سلوك تانى انتى مبتعمليهوش. متطلبيش من أطفالك مياكلوش من مطرح حد وهم شايفينك بتعملى كده. زى ما قلنا قبل كده , انتى ممكن تبقى مش شايفة ان طفلك بيسمع كل كلامك بس الأكيد انه شايفك ومركز مع سلوكك وتصرفاتك.

 

12) عدلى سلوكك: خلينا نتفق ان أكل الفشار أو الأيس كريم قدام التليفزيون أو فى السينما ده متعة من متع الحياة بصراحة. فطالما حتقدرى توازنى بين الأوقات الاستثنائية دى والوجبات الرئيسية والتمارين الجسدية , أطفالك حتبقى صحتهم كويسة ومش حيحسوا بالحرمان.

TagLabel: 

لقرأة مواضيع مشابهة, الرجاء الضغط علي احدي هذه الكلمات

Dislike
0