تابعونا أيضاً Facebook Instagram

الرياضة ، الموضه الجديدة

Image: 
Body: 

طبعآ انا مش باحاول اني اقلل من قيمة الرياضه و قد ايه هي مهمه لأطفالنا و شبابنا،انا بس باحاول القي نقطة ضوء علي ازاي مفهوم الرياضه اختلف من زمان عن دلوقتي....

من كام يوم كده خرجت مع اصحابي اللي كان بقالي كتير ماشفتهومش وده في حد ذاته حدث يستحق الاحتفال . طبعا لا يخفي عليكم ان الخروجات بيتخللها شكاوي كتير و ساعات استعراض عن مين اكتر واحده مطحونه ومين اكتر واحده عيالها مطلعين عينها.

المهم واحنا اعدين نتكلم الكلام جه علي التماريين بتاعت الاولاد . كله بقي كان عمال يتكلم و يحكي علي التماريين و مواعيدها و الجري اللي بيجروه كل يوم في سباق التماريين.روحت انا قايله ، و يارتني ما قلت، " ايه يا جماعه الأڤوره ديه ؟ الموضوع مش مستاهل " كله بقه بصلي نظرة اندهاش و راحت واحده منهم سألتني:" هو انتي ابنك بيلعب ايه ؟ "

كله بقه ساكت مستني ردي ، طبعآ انا رديت بكل فخر قولتلهم بيلعب كاراتيه !! لقيت بقي نظرة قرف كأني قلتلهم انه بيلعب كره شراب في الحاره !!! وبعدين راحت واحده قايلالي :"هو انتي مش شايفه ان الكاراتيه ده بقي لعبه قديمة و بيئة !!! "
بيئة !! هو ايه ده اللي بيئة. مالحقتش أرد لقتها بتنصحني و بتقولي :" انتي لازم تلعبيه لعبه ستايل كده زي سكواش او water polo ، او حتي لعبيه كره في النوادي الجديده ديه اللي تابعه لنوادي بره مصر!!"

طبعا انا كل ده ماكنتش عارفه ارد لأني كنت في حالة صدمه من الفكره ان حتي الرياضه دلوقتي بقت بتتصنف بالعاب بيءه و العاب ستايل.

قالولي اه طبعآ ، يعني مثلآ اي بنت دلوقتي لازم تكون بتلعب يا جمباز يا باليه . وانا عماله اقول في سري جمباز و باليه ايه نكنش ،عايشين في الاتحاد السوفيتي وانا مش واخده بالي ؟؟انا شخصيآ بيصعب عليا البنات اللي بيلعبوا جمباز لأن تماريين الجمباز ديه بيقشعر ليها الابدان ، يا عيني البنات بتتعذب ولا معتقل جوانتانموا!!

. يعني حتي الاطفال يعيني بقه مش من حقهم يلعبوا الرياضه اللي هما فعلا بيحبوها وبقم يتجبروا علي الرياضه الستايل .طبعا الكلام ده كله كان بيدور في دماغي و مجرأتش اقوله بصوت عالي لحسن اتصنف انا شخصيا اني بيءه .

المهم راحت نفس البنت سألاني تاني و بتلعبيه ايه تاني غير الكاراتيه ؟ قولتلها هو كاراتيه بس ، لقيت نفس نظرة الاندهاش و الامتعاض . قالتلي "ازاي ؟ انتي لازم تلعبيه علي الاقل لعبتين ". رحت رده عليها "لعبتين ايه بس وانتوا عمالين تشتكوا ان انتوا مش ملاحقين علي التماريين ؟؟" . تقوم واحده تانيه راده عليا تقولي " مش أحسن ماتقعدي بوزك في بوزهم طول اليوم" انا : بوزهم !! 
المره ديه انا اللي كان في حالة دهشه ، يعني انتوا حاطيين الولاد تحت ضغط نفسي و جسدي و عصبي عشان بس ماتقعدوش معاهم في البيت !!
صاحبة تانيه تقولي : " كله يهون ،انتي متتخيليش فرحة الاولاد لما بيكسبوا . دانا لما بحط الصوره علي الفيس بوك بتجيب مش أقل من ٢٠٠ لايك "
يعني انتوا بتعملوا كل ده عشان تتفشخروا بانجازات ولادكم !!

لقيت واحده بتقولي :" تعالي افرجك علي بطولة بنتي في المسابقه الأخيره" . امري لله ، اعدت اتفرج لقيت صاحبتي جايه هي و العايله و الصحاب و الجيران و بيشجعوا البنت كأنها بتلعب في الالومبيات . المهم البنت كسبت و خدت ميداليه فضه ، و الفيديو بقي كله دي بيعرض ازاي مامتها واخداها بالحضن و هاتك يا بوس و أحضان ولا كأنه يوم فرحها. مش ديه المشكله ، المشكله ان صاحبتي ديه عمري ماشوفتاها بتحضن ولا بتبوس بنتها في العادي.

قعدت أفكر اد ايه ده ممكن يسيب اثر سلبي عند الاطفال و ازاي ممكن يربطوا حب اهاليهم بانجازتهم الرياضيه .

المهم قلت لصاحبتي الف مبروك لبنتك 
قالتلي :" ده انا سبت الشغل مخصوص عشان اعرف اواديها التمارين"

طبعا كل ده كوم و التأثير بتاع المنظومه ديه علي الامهات العاملات . يعني انا كأم عامله ، ازاي ممكن انافس في المنظومه ديه ؟ ازاي ممكن أجيب الوقت ولا المجهود اني اوادي تماريين كل يوم. ازاي ممكن اولادي ينافسوا في المنظومه المعقده ديه ؟؟ ومعقولة حبة الوقت اللي بقعدهم مع ولادي يكون الوقت اللي في العربيه وانا باواديهم او اجبهم من التماريين؟؟


و السؤال الأهم بقي اللي بيطرح نفسه ، هو فعلا الرياضه تستاهل ان الاطفال مايعشوش طفولتهم عشان احنا شاغليين وقتهم كله
في تماريين و مذاكره و بس ؟؟ هو مش المفروض ان دول اطفال ومن حقهم انهم يبقي عندهم وقت يلعبوا او وقت يمارسوا هواية غير الرياضه او وقت حتي مايعملوش فيه حاجه؟ طب و هل الرياضه تستاهل اننا نربي في اولادنا روح المنافسه الشرسه ديه من وهما صغيريين ؟؟

اسئله كتيره ماعتقدش ان هالاقي ليها رد...

يلا اسيبكم بقي بقي عشان اروح اوصل اولادي للتماريين ؛-)

 

TagLabel: 

لقرأة مواضيع مشابهة, الرجاء الضغط علي احدي هذه الكلمات

Dislike
0