تابعونا أيضاً Facebook Instagram

يا فتاح يا عليم يا رزاق يا كريم

Image: 
Body: 

يوم الاحد ... أول الاسبوع ... اليوم اللي الواحد المفروض بيبقي راجع الشغل مفعم بالحيويه .اليوم اللي المفروض الواحد بيبقي مقبل علي أسبوع جديد في الشغل .

الواحد يبقي قاعد علي مكتبه كافي خيره شره ،و بيعمل مجهود خرافي اني يخلي عنيه مفتوحه يلاقي الواحد من دول داخل عليه في منتهي الحيويه و بابتسامه من الودن للودن ويقولي " صباح الخير ، شكلك نايمه كده ليه احنا مش لسه طالعيين من ويك آند ؟"

ويك اند ؟؟ انت بتقول ويك اند ؟؟ يا راجل ؟؟ هو اليومين اللي فاتو دول هما المفروض انهم كانوا الويك اند بتاعي اللي المفروض اني ارتاح فيهم ؟

طبعا باحاول ارسم ابتسامه ساحره علي وشي و اقول " معلش اصلي منمتش كويس امبارح "

تلاقي بقه في حالة استعجاب و اندهاش منقطعة النظير من الرد بتاعي و تلاقي الرد خابطك بقي " ليه ؟ دي فرصه ان الواحد يحاول يريح شويه في الويك اند"

تاااااني هيقولي الويك اند، برده مصَر يستفزني !!

يعني انت برده مصمم تعرف الويك اند بتاعي عامل ازاي ؟ تعال يا سيدي و انا اقولك .انامبدءبآ الويك اند بتاعي له اسم تاني ، اسمه " رضوي اند" والاسم ده بيرمز اني اناشخصيآ بنتهي في الويك اند ،

تعالي بقي احكيلك علي الويك اند بتاعي ، ابتديلك منين ؟؟ابتدي بالويك اند اللي باصحي فيه ٧ الصبح عادي عشان الولاد مش بيفرق معاهم احنا في يوم ايه و انه اصلا يوم اجازه؟؟ ولا ابتدي من اليوم اللي بقضيه بانضف البيت علشان الست اللي بتساعدني ماجتش كعادتها . ولا ابتدي باليوم اللي فضلت واقفه في المطبخ بحاول أطبخ أي حاجه تكفينا علي الاقل أول يومين في الاسبوع ؟؟ ولا احكيلك علي لستة المشاوير اللي مابتخلص واللي لازم اخلصها في الويك اند ؟؟ ولا عن التماريين اللي بقت بند جديد في لستت المشاوير ؟؟ احكيلك عن ايه ولا عن ايه ....

الواحد بيبقي خارج من الويك اند كأنه خارج من ساحة حرب وانت جاي تقلي صباح الخير !!

الغريبه ان اللي سألني السؤال ده بيفضل يتحاشاني طول الاسبوع ؟؟ غريبه ...

يا تري ليه ؟؟

 

Dislike
0