تابعونا أيضاً Facebook Instagram

المستلزمات المدرسية .... شيء أغرب من الخيال

Image: 
Body: 

 

مش عارفة هو أنا الوحيدة اللي عندها مشكله في اللستة بتاعت الأدوات المكتبية اللي المدرسة بتتطلبها كل سنة ولا في ناس زيي . مع كل بداية سنة جديده تلاقي المدرسه باعته لستة الحاجات اللي الولاد هيحتجوها خلال السنة.اللسته ديه بقي بتبقي متقسمة لكذا جزء

الجزء الاول هو جزء الأقلام

عدد ٢٠ قلم رصاص HB

عدد ١٠ قلم رصاص 2B

عدد ١٠ استيكة

عدد ٥ براية

عدد ٢٠ قلم جاف ازرق

عدد ١٠ قلم جاف احمر

عدد ١٠ قلم جاف اسود

عدد ١٠ قلم جاف اخضر

عدد ٢ مسطره

صراحة عدد الأقلام مهوول يعني الواحد لو مدخل ولاده مدرسة تخطيط مش هيطلبوا كم الاقلام ديه . يعني بالعدد ده هما بيفترضوا ان الولد بيكتب بقلم لمدة أسبوع واحد بس و يرميه. ده علي ايامينا كان في القلم اللي بكذا سن اللي كان فيه كل الالوان ده، الواحد كان بيجيبه ويقعد معاه كذا سنة كمان . وهو كان قلم رصاص واحد كنا نقعد نبري فيه لحد مايبقي عامل زي العقلة.

نيجي بقي لنوع تاني من الاقلام و هي اقلام ال  White board و الطلبات هي كالأتي

عدد ٢ سبورة صغيره ( مش عارفه ليه ٢ صراحة)

عدد ٣٠ قلم اسود سن عريض

عدد ١٠ قلم ازرق سن عريض   

عدد ١٠ قلم احمر سن عريض   

عدد ١٠ قلم اخضر سن عريض   

انا قلت بقي مبدهاش .. لازم أحسب الحسبه . مجموع عدد الأقلام اللي طالبينها  ٦٠ قلم ،لو هما طالبيين الاقلام ديه عشان الولاد يستخدموها و السنة الدراسيه تقريبا ٣٠ أسبوع يبقي الولد هيستخدم تقريبا قلمين في الأسبوع . وطبعا ده مش منطقي !! اما بقي لو هما طالبيين الاقلام ديه عشان المدرسيين يستخدموها يبقي نضرب ال ٦٠ قلم في ال٢٠ طالب يطلعوا ١٢٠٠ قلم للفصل . يعني أقلام تكفي مدرسة سنتيين قدام مش بس لفصل واحد في السنه . يعني برده كلام مش منطقي بس ماعلينا اكيد المدرسه فاهمه اكتر مننا.

نيجي بقة لفقرة التلزيق .. اللي واضح انها ماده جديده في كل المدارس و ديه طلبتها

(عدد ٥ انبوبة  )UHU حجم كبير

(عدد ٢٠ اصابع صمغ )pritt حجم صغير

(عدد ١٠ اصابع صمغ)pritt حجم كبير

دول لو كانوا بيشغلوا الولاد في تعليق منشورات ماكنوش هيحتاجوا كم الصمغ ده !!

طبعا ولأن المدرسه بتحب تطلع البيكاسو اللي جوه كل طفل .. فتلاقي بقي  في طلبات غريبه و غير منطقيه لحصة الرسم اللي هي بتبقي اصلا مره في الاسبوع و ده بيبقي البند الرابع

بند الرسم

عدد٥ اقلام رصاص

كراسة كانسون ابيض

كراسة كانسون الوان

عدد ٣ علب الوان خشب

عدد ٢ علب الوان فلومستر

الون مياه

الوان جواش

الوان زيت

عدد ٥ فرش احجام مختلفة

عدد ٢ مقص

مريله مشمع عشان الولاد

دانا لو كان ابني دخل فنون جميله مكنش هيحتاج كم الالوان ديه وبعدين هما امتي هيستخدموا كل الألوان ديه و بعدين الوان زيت و الوان جواش ايه اللي عايزينها اذا كنت انا اللي عمري ٣٥ سنه عمري ماستخدمتهم ولا اعرف شكلهم حتي !!

واخيرا ليس اخرا نيجي بقي لفقرة طلبات النظافة وهي كالاتي

عدد ٥ ديتول wipes حجم كبير

٥ كلينكس حجم كبير ( ده علي اعتبار ان الكلينكس ده بيتاكل اكيد بالعدد اللي هما طلبينه ده !!!)

وطبعا عشان كل مدرسه بتحاول تبين اد ايه هي مدرسه ملتزمه ، فكمان بيشترطوا اننا نجيب الحاجات ديه بماركات معينه و طبعا الماركات ديه لازم تبقي أغلي حاجه في السوق  .المهم جبت الحاجات ديه كلها و روحت علي الكاشير عشان أدفع  ، الراجل قعد يجي ٢٠ دقيقه بحسب في الحاجات و راح قايلي بابتسامه ساحرة :الحساب ١٨٠٠ جنيه يا فندم !!

١٨٠٠ جنيه !!! يعني مش كفايه مصاريف المدرسة و مصاريف الuniform و الbus والlunch  box .كمان الواحد يدفع قرب ال ٢٠٠٠ جنيه اقلام و لزق . فين ايام الواحد لما كان الواحد بيروح المدرسة بمقلمة فيها قلم جاف و قلم رصاص و برايه و استيكه و مسطره و كان الروش اللي فينا اللي كان يجيب قلم سنون ولا اقلام ملونة.

يا فندم يا فندم

فوقت علي صوت الراجل و هو بيناديني .

حضرتك مش هتدفعي ولا ايه.

بصتله كده وانا بحاول أفوق من هول الصدمة ورحت قيلاله لأ هدفع طبعا وانا أقدر مدفعش !!

وروحت مطلاعه الفلوس في الشنطه ومديهالوا والدمعه هتفر من عيني :"(

 

TagLabel: 

لقرأة مواضيع مشابهة, الرجاء الضغط علي احدي هذه الكلمات

Dislike
0

تعليقات

angelawish
Informative article, just what I needed.



Here is my weblog; plumbing is a plumber specialising in Innsworth
Wed, 03/28/2018 - 17:22